Paramount studiýasy şuter žanryndaky meşhur Call of Duty oýnuny ekranlaşdyrmak bilen meşgullanar.
Taslama Paramount bilen oýny işläp düzüji Activision kompaniýasynyň arasynda şertnama baglaşylandan soň resmi taýdan işe girizildi. Sýužet, režissýorlar we aktýorlar barada maglumat entek ýok. Filmiň önümçilik we çykjak möhleti hem yglan edilmedi.
Call of Duty oýny 2003-nji ýylda çykdy we wagtyň geçmegi bilen taryhda iň uly oýun franşizalarynyň birine öwrüldi. Ol bütin dünýäde 500 milliondan gowrak nusga bilen satyldy. Ilkinji bölümler Ikinji jahan urşunyň wakalaryna bagyşlandy, soňky wersiýalar bolsa häzirki wagtda, geljekde, kosmosda we beýleki ýerlerde bolup geçýär.
Paramount-yň ýolbaşçysy Dewid Ellison eýýäm köpden bäri bu oýnuň muşdagydygyny aýtdy. “Men Call of Duty-nyň ilkinji missiýalary we ondan soňky Modern Warfare we Black Ops çykany bäri mydama gowy görýän bu oýnumy oýnap köp wagt geçirdim”.
Activision-yň prezidenti Rob Kostiç hem şertnama teswir berdi: “Biz oýnumyzyň täsirli wakalaryny uly ekrana geçirip biljek ajaýyp hyzmatdaş hökmünde Paramount-y tapdyk. Biz oýnuň wepaly muşdaklarynyň göwnünden turjak we täze muşdaklary ruhlandyrjak ýatdan çykmajak blokbasteri döretmegi maksat edinýäris”.
