“Ol: Derrä hoş geldiňiz” (Оно: Добро пожаловать в Дерри) serialy 26-njy oktýabrda, Hellouiniň öňüsyrasy HBO Max akym hyzmatynda çykar. Bu barada hyzmatyň X sosial ulgamyndaky resmi sahypasynda habar berildi.
Serial Stiwen Kingiň “Ol” romanyna (1986) esaslanýar we “Ol” (2017) hem “Ol 2” (2019) horror filmleriniň prikwelidir. Waka 1962-nji ýylda Men ştatyndaky toslanyp tapylan Derri şäherinde, birinji filmdäki wakalardan 27 ýyl öň bolup geçer we masgarabaz Penniwaýzyň gelip çykyşy hem-de şäheriň elhenç syrlary barada gürrüň berer.
Penniwaýzyň keşbine Bill Skarsgord gaýdyp geler. Aslynda, ol 2023-nji ýylda bu keşbe gaýdyp gelmek islemeýändigini aýdyp, hatda öz ornuny eýelejek aktýora maslahat beripdi. Şeýle-de, seriala Teýlor Peýj, Ýowan Adepo, Kris Çok we Jeýms Remar gatnaşdy.
Birinji bölümiň ssenarisini Jeýson Faç ýazdy. Filmleriň režissýory Endi Musketti hem birnäçe bölüme režissýorlyk etdi. Taslama 2024-nji ýylyň awgustynda düşürilip tamamlandy.
Serial üç möwsümden ybarat bolar diýlip meýilleşdirilýär, olaryň wakasy bolsa dürli taryhy döwürde ýaýbaňlanar: ikinji bölek – 1930-njy ýyllar, üçünjisi XX asyryň başy barada. Goşmaça möwsümleri düşürmek çözgüdi birinjisiniň üstünligine baglylykda kabul ediler.
“Ol” we “Ol 2” filmleri bilelikde prokatda 1,7 mlrd dollardan gowrak ýygnady.
