Vogue amerikan žurnalynyň täze baş redaktory Hloýa Mal boldy. Ozal Mal žurnalyň baş saýtynyň – Vogue.com-yň redaktory wezipesini eýeleýärdi.
Saýtdan daşary 2022-nji ýyldan bäri Mal Britaniýada çykýan Vogue-nyň ýolbaşçysy Çioma Nnadi bilen bilelikde žurnalyň “The Run-Through with Vogue” podkastyny alyp barýardy.
Täze wezipede Hloýa Mal häzirkizaman moda dünýäsinde iň tanymal şahsyýetleriň biri bolan Anna Winturyň ornuny eýelär. Ol bu wezipeden 37 ýyl işläninden soň iýunda gitdi. Şol bir wagtyň özünde, Wintur Vogue-nyň global redaksion direktory, şeýle-de Condé Nast kontenti boýunça global direktor bolup galdy we GQ, Architectural Digest, Vanity Fair, Bon Appétit we Teen Vogue ýaly neşirleriň işine gözegçilik edýär diýip, CNN teleýaýlymy belleýär.
Hloýa Mal 39 ýaşynda. Ol aktrisa Kendis Bergen bilen režissýor Lui Malyň gyzy. 2011-nji ýyldan bäri Vogue-da işleýär, şeýle-de The New York Times, The Wall Street Journal we beýleki neşirler üçin hem makala ýazdy. Täze wezipede ol çap we sanly görnüşlerde Vogue-nyň gündelik işine jogap berer, ýöne gönüden-göni Wintura hasabat berer.
Synçy Loren Şerman Puck neşiri üçin materialda Anna Winturyň dalaşgärlere brendi aktual kontenti döretmek boýunça “maşyna” öwrüp biljek žurnalisti tapmalydygyny aýtmak bilen, oýlanyşykly hereket edendigini ýazýar.
