Konnektikut ştatyndan (ABŞ) internetde “Krokodil” lakamy bilen tanalýan Dugi Sandtiger 3,5 müň Crocs aýakgabyndan kolleksiýa ýygnady. Bu barada News 8 habar berýär.
Sandtigeriň üýtgeşik aýakgap bilen gyzyklanmasy tötänleýin ýüze çykdy. Çagalar öýünde we öweý maşgalalarda ýaşamagy onuň soňky durmuşyna täsir etdi.
Ol, mysal üçin, häli-häzire çenli bagjyk daňmagy öwrenmedi. “Men ululardan kömek soramaga örän utanýardym. Ýyl geçdigisaýyn ýaşym ulalsa-da, “Men häzirem nädip bagjyk daňmalydygyny bilemok” diýip pikir edýärdim. Indi bu birhili geň görünýär” – diýip, Sandtiger belleýär. Bu ýagdaý hem onuň rahat Crocs aýakgabyny saýlamagyna itergi berdi. Onuň kolleksiýasynda hatda öý haýwanlary üçin aýakgaplar, şol sanda itler üçin rezin şypbyk bar.
Aýakgaby saýlamak bilen Dugi durmuşa bolan özboluşly çemeleşmesini görkezýär. Bir gün ol öz hekaýatynyň giň köpçülige belli bolmalydygy baradaky netijä geldi. “Ginnesiň dünýä rekordyny täzelemek ýa-da goýmak we Ginnesiň kitabynda bolmak – bu iki aýry iş” – diýip, ol aýtdy.
Sandtiger 2024-nji ýylyň noýabrynda iň uly Crocs kolleksiýasynyň eýesi hökmünde rekord goýdy. Rekord onuň öz dogduk şäheri Uezersfildde tassyklandy. Bilermenleriň hasaplamasyna görä, ol kolleksiýa üçin ýüzlerçe müň dollar sarp etdi, ýöne şunuň bilen saklanmak islemeýär. Ol Crocsium ady bilen muzeý açmagy meýilleşdirýär.
