“Gladiator”, “Keseki” ýaly filmler bilen tanalýan britaniýaly režissýor Ridli Skott işi üçin 20 mln dollar teklip edilse-de, “Terminator 3-i” düşürmekden ýüz öwürdi. Bu barada ol The Guardian bilen söhbetdeşlikde aýtdy.
Skott Arnold Şwarsenegger derejesinde töleg sorandygyny, ýöne prodakşn-kompaniýa razy bolandan soň hem filmiň üstünde işlemek islemändigini düşündirdi. Şeýle-de, ol Bond baradaky filmleri hem hiç haçan düşürmejekdigini belledi.
“Bond baradaky filmiň düýp mazmuny – bu şatlyk we grotesk. “Terminator” – arassa komiks” – diýip, režissýor düşündirdi.
Ol “Terminatoryň” özi düşüren ýagdaýynda hakykata has ýakyn boljakdygyny belledi. “Ine, şonuň üçin maňa Bond baradaky filmi düşürmegi teklip etmediler – men ähli zady bulaşdyrardym” – diýip, režissýor aýtdy.
“Terminator” franşizasyny Jeýms Kemeron döretdi, ol seriýanyň ilkinji iki filmine prodýuserlik hem etdi. Onuň üçünji bölümiň üstünde işlemek meýilnamalary hukugyň ýarysyna eýeçilik edýän kompaniýanyň batmagy sebäpli bozuldy. Netijede, “Terminator 3: Maşynlaryň gozgalaňy” filmini soňky filmden on ýyldan gowrak wagtdan soň Jonatan Mostou düşürdi.
Ridli Skott häzir “Gladiator 3-üň” üstünde işleýändigini we “Kesekiniň” hem prikweliniň bolup biljekdigini aýtdy. Ol “Kesekiniň” dowamy üçin pikir bolsa, ony düşürjekdigini sözüniň üstüne goşdy.
Režissýor “Gladiator 3-de” gürrüňiň “düşen ýerinde bolmak islemedik adam” barada boljakdygyny aýtdy. Eger taslama durmuşa geçirilse, bu onuň filmografiýasynda trikwel boljak ilkinji film bolar, çünki ozal ol diňe sikwel düşürýärdi.
