Labubu oýunjaklaryny öndürýän Hytaýyň Pop Mart dükanlar ulgamynyň eýesi Wan Nin dünýäniň iň baý adamlarynyň Bloomberg Billionaires Index reýtingine girdi. Ol 26,5 mlrd dollar baýlygy bilen 85-nji orny eýeledi.
Ýylyň başyndan bäri hytaýly işewüriň emlägi 18,8 mlrd dollar artdy.
Labubu gahrymany on ýyl mundan ozal The Monsters kitaby üçin dizaýner Kasing Lung tarapyndan oýlanyp tapyldy. Bu ýiti dişli we uly gulakly jandar muşdaklaryň arasynda meşhur boldy. 2019-njy ýylda Pop Mart kompaniýasy Labubu oýunjaklaryny dürli reňkli brelok görnüşinde çykaryp başlady. Olar garaşylmadyk sowgat gutularynda satylýar we alyjylar haýsy oýunjagyň düşjekdigini öňünden bilmeýär. Şeýle usul satuwa itergi berdi: adamlar tutuş kolleksiýany ýygnamak üçin has köp satyn almaga başlady.
Iň baý adamlaryň reýtinginde birinji orny amerikaly telekeçi Ilon Mask eýeleýär – onuň baýlygy 386 mlrd dollara barabar. Ikinji orunda 289 mlrd dollar bilen Oracle korporasiýasyny esaslandyryjylaryň biri Larri Ellison ýerleşýär, ýylyň başyndan bäri onuň baýlygy 96,4 mlrd dollar artdy. Üçünji orny Meta kompaniýasynyň esaslandyryjysy Mark Sukerberg eýeleýär, onuň baýlygy 55,2 mlrd dollar artyp, 262 mlrd dollar boldy.
Şeýle-de, bäşlige Amazon-yň esaslandyryjysy we Blue Origin aerokosmos kompaniýasynyň eýesi Jeff Bezos ($250 mlrd) we Google Alphabet kompaniýasynyň baş ýerine ýetiriji müdiri Larri Peýj ($185 mlrd) girdi.
