Google kompaniýasy 2,5 mlrd Gmail ulanyjysyny ShinyHunters topary tarapyndan geçirilen haker hüjüminden soň paroly üýtgetmäge çagyrdy. Kompaniýa akkauntlarda şübheli hereketleri ünsli yzarlamagyň we iki şertli tassyklaýyş ýaly goşmaça gorag çärelerini ulanmagyň möhümdigini belledi diýip, New York Post habar berýär.
Google howpsuzlyk düzgünleri barada ýatlatdy: hakerler logini we paroly girizmek haýyşy bilen galp sahypalara salgylanmalar bilen hat ibermek ýa-da ulanyjylary iki şertli gorag kodlaryny aýtmaga ynandyrmak arkaly akkaunt maglumatlaryna elýeterli bolup biler.
Howpsuzlyga üns ýaňy-ýakynda bolup geçen waka bilen baglanyşykly: Google iýun aýynda Salesforce maglumatlar bazasynyň hakerler tarapyndan döwlendigini habar berdi. Hakerler özüni goldaw gullugynyň işgärleri hökmünde görkezdi, işçiler hem muňa ynandy. Netijede, umumy elýeterli maglumatlar, mysal üçin, kiçi we orta kärhanalaryň aragatnaşyk maglumatlary zyýan çekdi. Bilermenler şeýle usullaryň has uly hüjümlerde hem ulanylyp bilinjekdigini duýdurýar.
ShinyHunters topary 2020-nji ýyldan bäri hereket edýär we ozal AT&T, Microsoft, Santander we Ticketmaster ýaly kompaniýalaryň maglumatlarynyň syzmagyna gatnaşdy. Hakerler ogurlanan maglumatlary ýörite bir saýtda ýerleşdirip, hüjümiň pidalaryna basyş edýär.
Soňky wakalaryň täsir edip bilen ähli ulanyjylary 8-nji awgustda elektron poçta arkaly habarnama aldy.
