Internete Google, Apple, Facebook akkauntlaryndan we dünýädäki beýleki meşhur platformalardan 16 milliard login we parol syzdy. Bu barada Forbes habar berip, muny taryhda iň uly maglumat syzmasy diýip atlandyrýar.
Ýylyň başynda başlanan derňew syzmanyň ulanyjylaryň gajetlerinden maglumatlary gizlin ogurlaýan birnäçe programmanyň – infostilerleriň işi sebäpli bolup geçendigini görkezdi.
Derňewçiler ogurlanan maglumatlar bilen 30 maglumat bazasyny tapdy, olaryň her birinde onlarça milliondan 3,5 milliarda çenli ýazgy (login + parol) saklanýar. Bu bazalar sosial ulgamlardan, VPN hyzmatlaryndan, işläp düzüjiler üçin portallardan we uly IT kompaniýalaryň akkauntlaryndan loginleri we parollary öz içine alýar.
Hünärmenleriň aýtmagyna görä, alnan maglumatlar ähli möhüm serwislere – Apple-den, Facebook-dan we Google-dan başlap, GitHub, Telegram-a çenli sosial ulgamlara, iş saýtlaryna we hatda döwlet portallaryna elýeterlilik berýär.
“Bu köne bazalaryň gaýtadan ulanylmagy däl. Bu senagat derejesinde hüjümler üçin amatly bolan täze we howply maglumatlar” – diýip, derňewçiler belledi.
Hünärmenler ulanyjylara parollaryny üýtgetmegi, parollar menejerini ulanmagy we mümkin bolan ýerinde Passkeys açarlaryna geçmegi maslahat berýär. Maglumatlaryň darknete düşendigine ýa-da ýokdugyna gözegçilik edýän serwislerden hem peýdalanmak bolar.
Kompaniýalara nol ynam (Zero Trust) diýlip atlandyrylýan howpsuzlyk modellerini girizmek maslahat berilýär.
