Hytaýda Günorta-Hytaý deňziniň Nanşa arhipelagyndaky Ýunşu rifiniň töwereginde 2022-nji ýylda ýurtda resmi taýdan ýitip giden diýlip ykrar edilen suw süýdemdirijileriniň bir görnüşi – dýugon göründi. Bu barada China Daily habar berýär.
Ilkinji gezek bu jandara 8-nji iýulda syn edildi. Günorta-Hytaý deňziniň Okeanologiýa institutynyň alymlary ony yzarlap, hakykatdanam, şol görnüşdigini gutarnykly tassyklap bildi.
Dýugonlar 70 ýyl töweregi ýaşaýar, ýöne olarda dogluş derejesi pes. Olaryň agramy 500 kg çenli bolup, uzynlygy üç metre ýetip bilýär. Olar, esasan, ekoulgamy saklamaga kömek edýän deňiz otlary bilen iýmitlenýär.
Bu soňky 30 ýylda Hytaýda dýugona syn edilmeginiň ilkinji tassyklanan ýagdaýy boldy. Ozal 2008-nji ýylda ýurtda diňe jandaryň öli görnüşi tapylypdy.
Ylmy gözlegçiler jandaryň peýda bolmagyny sebitiň ekoulgamynyň ýagdaýynyň gowulaşmagy bilen baglanyşdyrýar. Hytaýda dýugonlar birinji derejeli döwlet goragynyň astyndadyr, Halkara tebigaty goraýyş birleşigi bolsa olary ejiz görnüşleriň hataryna degişli edýär.
