28-nji awgustda SpaceX kompaniýasy Falcon 9 raketasyny üstünlikli uçurdy – ol Ýere golaý orbita Starlink internet aragatnaşyk ulgamynyň täze hemralaryny çykardy.
Raketanyň B1067 belgili birinji köp gezeklik basgançagy uçuşdan soň Ýere gaýdyp geldi we eýýäm 30-njy gezek Atlantika ummanyndaky ýüzýän platformada asuda gondy. Bu netije köp gezeklik raketa göterijileri üçin täze rekord boldy.
B1067 basgançagy ilkinji gezek 2021-nji ýylyň iýunynda Halkara kosmos stansiýasyny üpjün etmek üçin Dragon ýük gämisi uçurylanda ulanyldy. Şondan soň ol 29 dürli missiýany ýerine ýetirdi:
- 19 gezek Starlink hemralaryny orbita çykardy;
- 7 gezek beýleki kosmos enjamlaryny çykardy;
- 2 gezek HKS-e ekipažly Crew Dragon gämisini uçurdy;
- 1 gezek stansiýa ýük eltdi.
Ýubileý uçuşy Falcon 9-y ençeme gezek ulanyp boljakdygyny tassyklady, bu uçuşlaryň bahasyny azaldyp, kosmos gatnawlary bazarynda SpaceX-iň ornuny berkidýär.
