Meşhur basketbolçylar Maýkl Jordan we Kobi Braýant tarapyndan gol goýlan kartoçka ABŞ-da Heritage Auctions auksionynda 12,9 mln dollara satyldy. Bu mukdar sport kartoçkalary üçin rekord boldy diýip, Bi-bi-si habar berýär.
Kartoçka Upper Deck Exquisite Collection 2007/2008 seriýasyna degişlidir. Gollardan başga-da, onda iki nagyşlanan logotip bar. Ol öňki eýesinde on ýyldan gowrak saklandy we 6 mln dollar baha bilen auksiona çykaryldy.
Auksion öýüniň müdiri Kris Aýwi bu kartoçkany häzirki kolleksionerler üçin “Mukaddes Graal” diýip atlandyrdy we şuňa meňzeş başga ýokdugyny belledi.
Auksion öýüniň maglumatlaryna görä, bu kartoçka sport kolleksiýasynyň dünýäsinde bahasy taýdan ikinji predmet boldy. Ondan gymmat satylan haryt beýsbol legendasy Beýb Rutyň 1932-nji ýylda çykarylan maýkasydyr, ol 2024-nji ýylyň awgustynda 24,12 mln dollara satyldy.
