Apple kompaniýasy her ýylky tanyşdyryş çäresiniň senesini mälim etdi. Çäre 9-njy sentýabrda, sagat 22:00-da (Aşgabat wagty bilen) kompaniýanyň Kaliforniýadaky Kupertino şäherindäki baş edarasynda ýerleşýän Stiw Jobs adyndaky teatrda geçiriler.
Apple-yň resmi saýtynda tanyşdyryş çäresiniň şygary hem getirilýär: «Ajap» («Awe dropping»).
Kompaniýanyň baş direktory Tim Kuk sosial sahypalarynda çäräniň tizerini çap etdi. Žurnalistler hem Apple tarapyndan iberilen çakylyklary görkezdiler.
Çärede kompaniýanyň dört sany täze iPhone 17 modelini, şol sanda Pro wersiýalaryny we şeýle hem ýuka görnüşli Air modelini tanyşdyrmagyna garaşylýar.
Mundan başga-da, çäräniň dowamynda täze Apple Watch Series 11, Apple Watch Ultra 3, Apple Watch SE 3, täze dizaýnly AirPods Pro 3 nauşnikleri, HomePod mini kolonka we täzelenen Apple TV 4K görkezilip bilner.
