Nissan kompaniýasy Hytaýda «Dongfeng» konserni bilen bilelikde öndürilýän täzelenen Teana sedanynyň ilkinji suratlaryny çap etdi. Täze model Teana Plus ady bilen çykarylar we şu ýylyň dördünji çärýeginde satuwa çykmagyna garaşylýar diýip, AutoHome habar berýär.
Esasy üýtgeşmeler awtoulagyň daşky görnüşine degişli. Awtoulagyň öň tarapy täze radiatoryň gözenegi, çyralary we has täsirli bamperi bilen täzeden işlenip düzülipdir. Yzky tarapynda bolsa, piksel nagyşly yşyk zolakly fonar we yşyklandyrylan marka nyşany ýerleşdirilipdir. Mundan başga-da, diametri 19 dýuýma çenli täze tekerler hem-de iki reňkli kuzow boýagy hödürlenýär. Modeliň uzynlygy 14 millimetr artdy we 4920 millimetre ýetdi, beýleki ölçegleri bolsa üýtgewsiz galdy.
Salony entek görkezilmedi, ýöne sedanda sanly gurallar paneli we mümkinçilikleri giňeldilen täze media ulgamy bilen üpjün edilmegine garaşylýar.
Sertifikasiýa maglumatlaryna görä, Teana Plus 243 at güýjüne eýe bolan iki litrlik turbo-motor bilen üpjün edilýär. Ol sekiz geçiriji guta çalym edýän wariator bilen işläp, güýji transmissiýa geçirýär. Hytaý bazarynda adaty Teana atmosferaly motorlar bilen hem hödürlenýär, ýöne täze wersiýada olaryň ulanylmagyna garaşylmaýar.
Deslapky maglumatlara görä, Nissan Teana we Teana Plus modellerini paralel ýagdaýda satuwa çykarmagy meýilleşdirýär.
