Kriştianu Ronaldunyň çykyş edýän "Al-Nasr" futbol kluby Saud Arabystanynyň Superkubogynyň final oýnunda "Al-Ahliden" utuldy. Duşuşyk "Gonkong - So-Kon-Po" stadionynda geçirildi.
Oýnuň esasy wagty deňme-deň - 2:2 hasabynda tamamlandy. Hasaby ilkinji bolup 41-nji minutda Ronaldu açdy, ol penaltiden gol geçirdi. "Al-Ahli" 45+6-njy minutda Fran Kessýeniň goly bilen hasaby deňledi. Marselo Brozowiç 83-nji minutda ýene "Al-Nasry" öňe çykardy, ýöne 89-njy minutda Rožer Ibanýes deňligi dikeltdi.
Penalti tapgyrynda "Al-Ahliniň" oýunçylary has takyk boldy - 5:3.
Esasy wagtda salnan gol Ronaldu üçin saud toparynyň düzüminde 100-nji boldy. Portugaliýaly hüjümçi dört dürli klubda 100 gol belligine ýeten taryhda ilkinji futbolçy boldy. Geçirilen goldan soň türgen duýgularyna erk edip bilmän, gözüni ýaşlady diýip, Fox Sports ýazýar.
Karýerasynyň dowamynda Ronaldu gol geçirdi:
- 450 gezek Madridiň "Realynda";
- 145 gezek "Mançester Ýunaýtedde";
- 101 gezek "Ýuwentusda";
- 100 gezek "Al-Nasrda".
Iýunda Ronaldu Er-Riýadyň kluby bilen şertnamany 2027-nji ýyla çenli uzaltdy. Hüjümçi Portugaliýanyň milli ýygyndysynyň düzüminde 2016-njy ýylyň Ýewropa çempiony we iki gezek UEFA-nyň Milletler ligasynyň ýeňijisidir. Ol karýerasynda Lissabonyň "Sportinginde" hem çykyş etdi.
