“Jeýms Uebb” kosmos teleskopy Uranyň täze hemrasyny açdy – ol S/2025 U1 adyny aldy. Indi planetanyň mälim hemralarynyň sany 29-a ýetdi diýip, NASA habar berdi.
Agentlik bu açyşyň 2025-nji ýylyň 2-nji fewralynda bolandygyny belleýär. Asman jisiminiň diametri, takmynan, 10 kilometr diýlip hasaplanýar. NASA onuň hut kiçi göwrüminiň 1986-njy ýylda “Woýajer-2” zondy Uranyň gapdalyndan uçup geçende görünmegine päsgel beren bolmagynyň mümkindigini belledi.
Täze hemra Uranyň merkezinden, takmynan, 56 müň kilometr aralykda ýerleşýär we Ofeliýa bilen Býanka hemralarynyň orbitalarynyň arasynda planetanyň ekwatorial tekizliginde hereket edýär.
“Onuň tegelek orbitasy onuň, ähtimal, häzirki ýerleşýän ýerinden uzak bolmadyk ýerde dörändigini çaklamaga mümkinçilik berýär” – diýip, Günorta-Günbatar gözleg institutynyň (SwRI) öňdebaryjy hünärmeni Mariame El Mutamid gürrüň berdi.
Uranyň ilkinji iki hemrasy – Titaniýa we Oberon – 1787-nji ýylda angliýaly astronom Uilýam Gerşel tarapyndan açyldy. Häzirkiden öňki soňky açyş 2023-nji ýylyň noýabrynda boldy: şol wagt Çilidäki Las-Kampanas obserwatoriýasynda S/2023 U1 hemrasy görüldi.
