HBO “Garri Potter” serialynda Uizli maşgalasynyň agzalarynyň keşplerini ýerine ýetirjek aktýorlaryň atlaryny yglan etdi. Bu barada The Hollywood Reporter habar berýär.
Fred Uizliniň keşbini ekranda Tristan Harland, Jorj Uizlini – Gabriel Harland, Persi Uizlini – Rori Spuner, Jinni Uizlini – Greýsi Kokreýn janlandyrar.
Eseriň esasy gahrymanlarynyň biri bolan Ron Uizliniň keşbini Alaster Staut aldy, bu barada maý aýynda belli bolupdy. Garri Potteri Dominik Maklaflin, Germiona Greýnjeri Arabella Stenton oýnar.
Serial Joan Roulingiň ýedi kitaby boýunça düşürilýär: “Garri Potter we jadygöýiň daşy”, “Garri Potter we gizlin otag”, “Garri Potter we Azkaban ýesiri”, “Garri Potter we alaw kubogy”, “Garri Potter we Feniks ordeni”, “Garri Potter we gany garnuwly şazada” we “Garri Potter we Ölüm peşgeşi”. Roulin taslamanyň ýerine ýetiriji prodýuseri hökmünde çykyş edýär.
Her bir kitabyň esasynda ýedi möwsüm çykarmak meýilleşdirilýär. Premýera HBO Max akym platformasynda bolar.
