Ady agzalmaýan milliarder Atlantik ummanynyň düýbündäki “Titanik” gämisiniň galyndylarynyň ýanyna düşmek kararyna geldi we munuň üçin 10 mln dollar tölär. Ol 2023-nji ýylda “Titan” suwasty enjamy bilen bolan heläkçilikden soň, suwa giden gäminiň ýanyna ugrajak ilkinji adam bolar diýip, çeşmä salgylanyp, New York Post gazeti habar berdi.
Ekspedisiýa barada giňişleýin maglumat berilmeýär, ýöne ol professional toparlar bilen işjeň ara alnyp maslahatlaşylýar. NYP-yň çeşmesiniň aýtmagyna görä, ekspedisiýa birnäçe hepdeden amala aşyrylar. “Siz onuň adyny bilýän bolsaňyz gerek” – diýip, neşiriň söhbetdeşi belleýär.
Ol geljekki syýahat barada milliarderiň özüniň yglan etmegine päsgel bermek islemeýändigini aýtdy.
2023-nji ýylyň 18-nji iýunynda “Titan” suwasty enjamy 1912-nji ýylda 3,8 km çuňlukda Demirgazyk Atlantikde gark bolan “Titanik” gämisiniň ýanyna çümen wagty ýitirim boldy. Enjam bilen aragatnaşyk aşak düşüp başlanyndan iki sagat geçmänkä ýitdi.
Dört günden soň halasgärler onuň döwük böleklerini tapdy: “Titanyň” heläkçiliginiň sebäbi imploziýa boldy – gäminiň korpusy suwuň ýokary basyşyna çydap bilmän, içine gysyldy. Bortdakylaryň ählisi şol pursat heläk boldy. Enjamyň bölekleri we ekipažyň agzalarynyň çak edilýän galyndylary soňrak suwuň ýüzüne çykaryldy.
OceanGate Expeditions amerikan kompaniýasynyň enjamynyň bortunda bäş adam bardy: kompaniýanyň esaslandyryjysy, millioner Stokton Raş, suw düýbüniň gözlegleriniň fransiýaly weterany Pol-Anri Naržeole, britaniýaly milliarder we kosmos syýahatçysy Hamiş Harding, pakistanly millioner Şahzada Dawud we onuň 19 ýaşly ogly Suleýman.
