“Ýüzükleriň hökümdary” (The Lord of the Rings) franşizasyndaky indiki filminde hobbit Frodo we jadygöý Gendelf sahna çykar. Bu barada Gendelfiň keşbini ýerine ýetirýän aktýor Ien Makkellen Londonda geçirilen “For the Love of Fantasy” atly duşuşykda mälim etdi.
“Iki sany syr açaýyn: filmde Frodo we Gendelf atly gahrymanlar bolar. Häzirlikçe diňe şu!” diýip belläp, öz roluna dolanyp gelýändigini anyk aýtmasa-da, tomaşaçylar muny yzyna gaýdyp geljekdigine alamat hökmünde kabul etdiler.
Piter Jeksonyň 2001–2003 ýyllar aralygynda surata düşüren trilogiýasynda Frodonyň keşbini Elaýja Wud janlandyran bolsa-da, onuň täze taslama gatnaşýandygy entek tassyklanmady.
Makkelleniň aýtmagyna görä, filmiň surata düşürilişi 2026-njy ýylyň maý aýynda başlanar. Režissýor hökmünde Endi Serkis çykyş eder we şol bir wagtda Gollumyň keşbine hem dolanar.
Filmiň premýerasy 2027-nji ýylyň 17-nji dekabrynda garaşylýar. Taslamanyň prodýuserleriniň arasynda Piter Jekson hem bar.
