Bitkoiniň bahasy geçen hepde rekord 124 496 dollara ýetenden soň, 2% - 115 527 dollara çenli pese düşdi diýip, CNBC habar berdi. Duşenbe güni söwdalaryň dowamynda ol 114 706 dollara çenli peseldi.
Öz gezeginde, Ethereum 4%, 4290 dollara çenli arzanlady. Geçen hepde onuň bahasy rekord 4800 dollara golaýlady.
CNBC-niň maglumatlaryna görä, pese gaçyş maýadarlaryň girdeji almak islegi bilen baglanyşykly boldy, bu hem köpçülikleýin satuwa getirdi. Analitikler 133 643 treýderiň bir günde 576,35 mln dollarlyk aktiwleri satandygyny belleýär. Olardan 124 mln dollar bitkoiniň we 184 mln dollar Ethereum-yň paýyna düşdi. Likwidasiýa treýderler karzlary üzmek üçin aktiwleri bazar bahasyndan satmaly bolan ýagdaýynda bolup geçýär, bu hem bahalaryň has peselmegine getirýär.
Maýadarlaryň lapykeçligi ABŞ-nyň maliýe ministri Skott Bessentiň sözlerinden soň has-da güýçlendi. Ol Donald Tramp tarapyndan martda döredilen bitkoinleriň strategik ätiýaçlygynyň diňe federal hökümet tarapyndan ele salnan kriptowalýutalaryň hasabyna dolduryljakdygyny düşündirdi.
Öňdebaryjy sanly aktiwleriň dinamikasyny görkezýän CoinDesk 20 indeksi 3,7% peseldi. Kriptowalýuta kompaniýalarynyň paýnamalary hem arzanlady: Bitmine Immersion 8%, Bullish – 7%, Circle we Coinbase – 2% ýitirdi.
