Hytaýyň LandSpace Technology kompaniýasy suwuk kislorodda we metanda işleýän Zhuque-2E Y3 raketa göterijisiniň synagynyň şowsuz tamamlanandygyny habar berdi.
Uçuryş 15-nji awgustda Szýusýuan kosmodromynyň 96A meýdançasyndan amala aşyryldy. Uçuşdan sekiz sagatdan gowrak wagtdan soň kompaniýa uçuşda näsazlygyň ýüze çykandygyny we onuň sebäpleriniň derňelýändigini aýtdy diýip, kompaniýanyň beýanyna salgylanyp, SpaceNews habar berýär.
China in Space çeşmesiniň maglumatlaryna görä, näsazlyk ikinji basgançak aýrylandan soň bolup geçdi. Ýitirilen peýdaly ýük barada maglumat berilmeýär. Ýöne neşir bortda Starlink ýaly geljekki GuoWang orbital toplumynyň dört hemrasynyň bolup bilendigini belleýär.
LandSpace bolup geçen hadysa üçin müşderiden ötünç sorady. Bu Zhuque-2 hatarynda eýýäm ikinji heläkçilik boldy: 2022-nji ýylyň dekabrynda uçuş ikinji basgançagyň hereketlendirijileri bilen bagly näsazlyk sebäpli şowsuz tamamlandy. Raketanyň täze görnüşinde bu elementler çalşyldy, ýöne mesele barybir galdy.
Şowsuz uçuş kompaniýanyň meýilnamasyna täsir edip biler: ozal ýylyň ahyryna meýilleşdirilen has agyr raketa Zhuque-3-üň uçuşy yza süýşürilip bilner.
2023-nji ýylyň iýulynda LandSpace metanda we suwuk kislorodda işleýän raketany orbita üstünlikli çykaran dünýäde ilkinji kompaniýa boldy. Bu hem onuň raketa ýangyjynyň ekologiýa taýdan arassa görnüşini ulanmakda öňdebaryjy ornuny berkitdi.
