Kembrij sözlügine “skibidi”, “tradwaýf” we “delulu” sözleri girdi. Bu internet medeniýetiniň iňlis diline ýetirýän täsiriniň artýandygyny görkezýär diýip, The Guardian habar berýär.
“Internet medeniýeti iňlis dilini üýtgedýär we bu hadysa syn etmek, onuň netijelerini bolsa sözlükde bellige almak gyzykly” – diýip, sözlügiň leksik programmasynyň ýolbaşçysy Kolin Makintoş belledi. Ol täze sözleriň diňe “ornaşar diýlip hasaplanan” ýagdaýynda goşulýandygyny aýtdy.
“Skibidi” sözi “jalaý” ýa-da “erbet” ýaly dürli manylary aňladyp biljek ýa-da bellibir manysy bolmadyk degişme hökmünde ulanylyp bilinjek söz” hökmünde kesgitlenýär. Ol Skibidi Toilet animasion serialyndan soň meşhur boldy. Onda adam kellesi çykyp duran unitazlar kelleleri kameralar, dinamikler we telewizorlar bilen çalşyrylan adamlar bilen uruşýar.
“Delulu” sözi “delusional” (“samyrdy”) sözünden gysgaltmadyr. Sözlükde ol “adatça, öz islegiň boýunça, hakyky ýa-da dogruçyl däl bir zada ynanmak” ýaly düşündirilýär.
“Tradwaýf” – “tradional wife” jümlesinden bolup, “sosial ulgamlarda post ýerleşdirýän zenany” aňladýar. Adalga aýallaryň eje we öý ojagynyň goragçysy bolmalydygy baradaky konserwatiw garaýyşlary öňe sürüp, degişli kontentleri hödürleýän zenan blogerlere degişlidir.
Şeýle-de, “broligarhiýa” (“bro” – “gardaş” we “oligarchy” – “oligarhiýa” sözlerinden birleşme) sözi bolup, ol syýasy täsire eýe bolmak isleýän tehnologiýa pudagyndan abraýly erkek adamlaryň uly bolmadyk toparyny aňladýar. Sözlüge – “mouse jiggler” adalgasy hem girdi. Ol adam işlemeýän wagty kompýuter işjeňligini ýasaýan gurluş ýa-da programmadyr.
Kembrij sözlügi iňlis dilini öwrenýänler üçin esasy sözlükleriň biri. 2024-nji ýylda oňa 3200-den gowrak, soňky bir ýylda bolsa 6000-den gowrak söz we aňlatma goşuldy.
