Günüň Ýere bakýan tarapynda Gün tegmilleri asla galmady diýen ýaly. Bu barada RYA-nyň Kosmos gözlegleri institutynyň Gün astronomiýasy barlaghanasy habar berdi.
Hünärmenleriň maglumatlaryna görä, ýokary takyklykdaky suratlarda häzir dört sany tegmilli ýeri görmek bolýar. Ähtimal, Günüň arka tarapynda-da ýagdaý şeýle bolsa gerek. Adatça, tegmilleriň sanynyň azalmagy alawlama işjeňliginiň peselmegine getirýär.
“Eger hiç zat üýtgemese, onda indiki hepdäniň başyna çenli alawlamalaryň sany düýbünden nola gelip biler, bu howa duýgur adamlar üçin gowy, radio söýüjiler üçin bolsa gynançly habar” – diýip, synçylar belledi.
Şol bir wagtyň özünde hünärmenler şu günden başlap koronal deşik sebäpli geomagnit tupanlarynyň bolmagyna garaşylýandygyny çaklaýar. RYA-nyň alymlarynyň habar bermegine görä, 15-nji awgustda Günüň görünýän tarapyndaky bu deşigiň meýdany bir günde, takmynan, 50% ulaldy.
Ylmy gözlegçileriň maglumatlary boýunça, deşigiň çäginde “Gün ýeliniň has tiz we dykyz akymyna” garaşylýar, çünki garalma diňe bir ýokarky däl, eýsem Gün atmosferasynyň aşaky gatlaklarynda-da görünýär.
