Geçen çärýegiň jemi boýunça iň uly şahsy kompýuterleri öndürijileriň biri bolan Lenovo arassa girdejisini 108% - 505 mln dollara çenli ýokarlandyrdy. Görkezijiler analitikleriň 308 mln dollar çaklamasyndan ep-esli ýokary boldy. Girdeji 22% ýokarlanyp, 18,8 mlrd dollara ýetdi. Bu kompaniýanyň çärýek hasabatyndan gelip çykýar.
Girdejiniň ösmegine maýa goýum amallary ýardam etdi, ýöne esasy çeşme onuň esasy işi boldy. Counterpoint Research-yň hasaplamalaryna görä, Lenovo-nyň PK üpjünçiligi çärýekde 15% ýokarlandy, umumy bazar 8,4% ösdi. Bu 2022-nji ýyldan bäri iň ýokary ösüş boldy. Ösüşe, esasan, Windows 10-y ulanmakdan ýüz öwürmek zerurlygy we ABŞ-da import üçin ýokary gümrük paçlarynyň girizilmegi sebäpli bahalar ýokarlanar diýen gorky itergi berdi.
Analitikler ikinji ýarymýyllykda bazaryň ýyllyk hasabynda pese gaçyşy görkezmegine garaşýar.
Serwer enjamlary segmentinde Lenovo rekord 4,3 mlrd dollar girdeji gazandy – bu geçen ýylky görkezijiden 36% ýokarydyr. Ösüş emeli aň ulgamlary üçin maglumat merkezlerine bolan gyzyklanma bilen baglanyşyklydyr. Muňa garamazdan, serwer bölümçesi 85,5 mln dollar möçberde ýitgi hasaba aldy, bu hem kompaniýanyň paýnamalarynyň bahalarynyň peselmegine getirdi.
Lenovo-nyň ýolbaşçylygy amerikan paçlarynyň täsiriniň pesdigini, çünki kompaniýanyň 10-dan gowrak döwletde 30-dan gowrak zawodynyň bardygyny belledi. Çaklamalara görä, global PK bazary indiki ýylyň mart aýyna çenli ýylda 5-9% ýokarlanar, şol bir wagtyň özünde Lenovo-nyň görkezijileri bazaryň ortaça görkezijisinden ýokary bolar.
