Pekinde gumanoid robotlaryň ilkinji Bütindünýä oýunlary açyldy. Ýaryşlara 16 ýurtdan 280 topar gatnaşýar diýip, Associated Press we GizmoChina habar berdi.
Oýunlar 15 – 17-nji awgustda 2022-nji ýyldaky Olimpiada üçin gurlan “Buz lentasy” milli konki stadionynda geçirilýär. Çäräniň guramaçylary hökmünde Pekiniň hökümeti, China Media Group, robototehnika pudagynda Bütindünýä hyzmatdaşlyk guramasy we Aziýa-Ýuwaş umman halkara geňeşi RoboCup çykyş etdi.
Oýunlara robototehnika kompaniýalaryndan we Hytaý uniwersitetlerinden toparlar gatnaşýar. 500-den gowrak adam şekilli robotlar futbolda, ylgawda we boksda ýaryşýar. Sport işlerinden başga-da, robotlar dermanlary tertipleşdirmek, otaglary arassalamak, ýükleri ýüklemek we düşürmek ýaly myhmanhanalarda, hassahanalarda, ammarlarda we önümçilikde ulanylyp bilinjek başarnyklaryny görkezýär.
Ýaryşlar üçin dört esasy zolak taýýarlandy: 2,1 metr uzynlykda ylgaw ýodasy, 5×5 metrlik futbol meýdançasy, boks ringi we goşmaça meýdançalar. Şeýle-de, uzak aralykdan dolandyryş üçin ýörite meýdança gurnaldy, bu ýerde operatorlar hakyky wagtda 5G-A ulgamy arkaly robotlary dolandyrýar.
Ýaryşyň çäklerinde hem algoritmleriň esasynda özbaşdak hereket edýän robotlar, hem operatorlaryň gözegçiligindäki modeller ulanylýar.
Açylyş dabarasynda robotlar futbol oýnady we boksa gatnaşdy, salto etdi, aýdym-saz gurallarynda çykyş edip, moda görkezilişine gatnaşdy.
Ýaryşlar üçin petekleriň bahasy 180 ýuandan (25 dollar) 580 ýuana (80 dollar) barabar.
