17-nji awgustda Aşgabat wagty bilen 14:30-da diametri 50 metr töweregi bolan 2025 PM asteroidi Ýeriň golaýyndan uçup geçer.
Russiýanyň Ylymlar Akademiýasynyň Kosmos gözlegleri institutynyň Gün astronomiýasy barlaghanasynyň maglumatlaryna görä, planeta çenli iň az aralyk, takmynan, bir Aý orbitasynyň diametrine barabar bolar – bu bir million kilometrden az.
Barlaghana onuň howply bolup biljekleriň sanawyna goşulandygyny belleýär.
Hasaplamalara görä, onuň Ýer bilen çaknyşmak ähtimallygy örän pes we diňe başga bir asman jisimi bilen çaknyşan ýagdaýynda bolup biler. Eger şeýle bolan halatynda 50 metrlik asman daşynyň gaçmagy onlarça kilometre uzaýan weýrançylyga getirip biler. Şol sebäpli astronomlar Ýerden on Aý orbitasynyň diametrinden az zolaga uçup girýän ähli jisimleri ünsli yzarlap, olaryň orbitasyny hemişe anyklaýar.
Alymlar şeýle ululykdaky meteoritiň, takmynan, 50 müň ýyl ozal gaçandygyny we ABŞ-da Arizona krateriniň (Berrinjer krateri) emele gelmeginiň sebäbi bolandygyny ýatlap geçdi.
2025 PM Apollonlaryň – orbitalary Ýeriňki bilen kesişýän asteroidleriň toparyna degişlidir. Ol 1-nji awgustda ýüze çykaryldy we deslapky maglumatlara görä, daş bölegi bolup, Günüň daşyndan iki ýylda bir aýlaw edýär.
Şu ýylda ýene bir uly asman jisiminiň şeýle ýakyn aralykdan sentýabryň ahyrynda uçup geçmegine garaşylýar.
