133 ýyllyk taryhy bolan dünýäniň iň gadymy foto-kompaniýalarynyň biri – Eastman Kodak amerikan kompaniýasy bergiler sebäpli işini dowam etdirmeginiň näbellidigini aýtdy diýip, CNN habar berýär.
Girdejiler we ýitgiler baradaky täze hasabatda kompaniýa 500 mln dollar möçberde bergini üzmek üçin kepilli pulunyň ýa-da tiz satyp boljak aktiwleriniň ýokdugyny görkezdi. Kodak maliýe ýagdaýyny gowulandyrmak üçin hatda pensiýa meýilnamasy boýunça tölegleri bes etmegi meýilleşdirýär. Şol bir wagtyň özünde, kompaniýa eksport üçin gümrük paçlarynyň biznese uly täsir etmejekdigini, çünki kameralardan we syýalardan başlap, plýonka çenli esasy önümçiligiň ABŞ-dadygyny belledi.
Estman Kodak 1892-nji ýylda Roçesterde (Nýu-Ýork ştaty) esaslandyryldy we bir asyrdan gowrak wagt fotoplýonka, fotokamera we şuňa meňzeş materiallary öndürmekde dünýä lideri boldy. “Siz düwmäni basýarsyňyz – galan zady biz edýäris” şygary XX asyrda köpçülikleýin fotosuratlaryň nyşany boldy.
1990-njy ýyllaryň ahyryndan başlap, sanly tehnologiýalaryň ösmegi bilen kompaniýa biznes-modelini üýtgedip ýetişmändigi sebäpli öňdebaryjylygyny ýitirdi. 2012-nji ýylda Kodak batandygy barada arza berip, 2013-nji ýylda giň gerimde üýtgedip gurmak işini geçirdi. Soňra kompaniýa täze ugurlary ösdürmäge synanyşdy we 2018-nji ýylda Kodakcoin kriptowalýutasyny işe girizdi. 2020-nji ýylda farmasewtika bazaryna çykmak meýilnamalary barada aýtdy. Ýöne kompaniýa öňki ornuny yzyna gaýtaryp bilmedi.
