Samsung kompaniýasy täze Micro RGB yşyk tehnologiýaly dünýäde ilkinji telewizoryny çykardy. Ol ilkinji gezek Las-Wegasda geçirilen CES 2025-de yglan edildi.
115 dýuýmlyk model ilki Günorta Koreýada 44,9 million wona (takmynan 32 362 dollar), soňra ABŞ-da we beýleki ýurtlarda elýeterli bolar. Öndüriji geljekde dürli ululykdaky Micro RGB telewizorlaryny çykarmagy meýilleşdirýär.
Micro RGB tehnologiýasy Mini-LED-iň kämilleşdirilen görnüşi hasaplanýar. Ak ýa-da gök yşyk-diodly lampalaryň ýerine suwuk kristal paneliň aňyrsynda ölçegi 100 mikrondan kiçiräk gyzyl, ýaşyl we gök diodlar ýerleşýär. Her element aýratynlykda dolandyrylýar, bu reňk takyklygyny we kontrastyny gowulandyrýar.
Samsung-yň berýän maglumatlaryna görä, Micro RGB-niň AI hereketlendirijisi her kadry häzirki wagtda seljerýär we “şekiliň has real we ünsüňi çekiji bolmagy üçin” reňk berlişini optimallaşdyrýar. Tehnologiýa garaňky sahnalarda reňki güýçlendirip, olary has ýagty we doýgun edýär.
Bu telewizorlar MicroLED modellerinden has arzan düşýär: deňeşdirmek üçin, Samsung-yň 110 dýuýmlyk MicroLED telewizorynyň bahasy 150 000 dollar.
4K modelinde 144Gs täzeleniş tizligi, AI ulaldylyşy, HDR10 + goldawy, Dolby Atmosly 70-wattlyk 4.2.2 ses ulgamy, dört sany HDMI 2.0, iki sany USB-A, Wi-Fi we Bluetooth bar. Telewizor Tizen OS-da işleýär, Matter bilen utgaşýar we Philips Hue yşyklandyryşyny surat bilen sinhronlap bilýär. Öndüriji ýedi ýyllyk täzelenmäni wada berýär.
Samsung Mini LED telewizorlaryna öňdebaryjy çemeleşýän ýeke-täk kompaniýa däl. Şu ýylyň başynda Sony General RGB LED Backlight-i, Hisense bolsa 97% BT.2020 örtügi bilen 116 dýuýmlyk TriChroma-ny görkezdi. Samsung şol bir aralygyň reňklerini 100% köpeldýän Micro RGB tehnologiýasynyň hasam gowudygyny aýdýar.
