Apple 2026-njy ýylyň ahyrynda OLED displeýli ilkinji noutbugyny çykarmagy meýilleşdirýär. Bu barada Dealsite koreý neşiri habar berdi.
Geljekki MacBook üçin OLED panellerini üpjün ediji hökmünde bolsa Apple Günorta Koreýanyň Samsung Display kompaniýasyny saýlady.
Bu kompaniýa 8.6 nesliň OLED panellerini işläp taýýarlamagy başardy. Şeýle ekranlar şekilleriň ýokary hilli bolmagyny üpjün edýär we az energiýa sarp edýär.
Noutbugyň anyk modeli agzalmasa-da, ilkinji bolup OLED ekranyny has gymmat MacBook Pro-nyň almagyna garaşylýar. Soňra şeýle displeýler MacBook Air-de hem peýda bolup biler.
Häzir MacBook Pro-da miniLED displeýleri ulanylýar. Bilermenler OLED ekranlaryna geçmegiň 2021-nji ýyldan bäri kompaniýanyň kompýuterlerinde esasy üýtgeşme boljakdygyny belleýär.
Belläp geçsek, bazarda eýýäm OLED ekranlaryny ulanýan noutbuklar az däl. Mysal üçin, Dell, HP we Lenovo kompaniýalarynyň modelleri Samsung Display-iň panelleri bilen hödürlenýär.
