OpenAI kompaniýasy ChatGPT-niň täze wersiýasyny – GPT-5-i hödürledi.
“Biz häzirki günde iň gowy emeli aň ulgamymyz bolan GPT-5-i hödürleýäris. Bu haçan çalt jogap bermelidigini we hünärmen derejesinde jogaplar bilen üpjün etmek üçin haçan köpräk pikirlenmelidigini bilýän ýeke-täk ulgamdyr” – diýlip, kompaniýanyň saýtynda habar berilýär.
Kompaniýa GPT-5-iň ýazuw, programmirleme we saglygy goraýyş ýaly ugurlarda has akylly, tiz we “has peýdaly” bolandygyny, modeliň gallýusinasiýa derejesiniň bolsa ep-esli peselendigini belleýär.
GPT-5 ähli ulanyjylar üçin ýazylyşyk bolmazdan açyk bolar. Olar 5 sagadyň içinde çat-bota 10 gezek ýüz tutup biler. Çäge ýetilenden soň, çat-bot awtomatik ýagdaýda ýönekeýleşdirilen wersiýa geçer. “Pikir ýöredýän” GPT-5 Thinking-den mugt peýdalanmak mümkinçiligi günde bir habar bilen çäklendirilýär.
OpenAI-iň ýolbaşçysy Sem Altman GPT-5 bilen deňeşdirilende 2023-nji ýylda çykarylan GPT-4 modeliniň “has ejiz” ýalydygyny aýtdy. “Bu maňa iPhone-yň uly pikselli köne modellerden Retina displeýine geçişini ýatladýar” – diýip, ol belledi.
Tanyşdyrylyşda işläp düzüjiler GPT-5-de ýönekeý ýüz tutma bilen işleýän web-programmany döredip bolýandygyny görkezdi. Mysal hökmünde fransuz dilini öwrenmek üçin doly dizaýnly hyzmat döredildi.
OpenAI-iň tehnologiýa hyzmatdaşy we uly maýadary hökmünde çykyş edýän Microsoft korporasiýasy eýýäm täze dil modelini Copilot, Microsoft 365 Copilot, Azure AI Foundry, GitHub Copilot ýaly hyzmatlaryna goşup başlady. GPT-5 ýüzlenmäniň kontekstine baglylykda jogaplaryň çylşyrymlylyk derejesini özbaşdak saýlaýar we täze intellektual režim – Smart Mode hökmünde Copilot-da ulanylar. Täze intellektual režim EA kömekçisine çylşyrymly logiki meseleler üçin GPT-5-i we gysga soraglar üçin has ýeňil wersiýany ulanyp, modelleri üýtgedip durmaga mümkinçilik berýär.
