Galaxy Z Fold 7-ni mahabatlandyrmak bilen, Samsung bu eplenýän smartfonyň adaty şertlerde 500 000 gezege çenli açyp-ýapmaga çydamlydygyny aýtdy. Tech IT kanalyndan YouTube blogeri muňa göz ýetirmek kararyna gelip, smartfony 200 müň gezek açyp-ýapmak synagyndan geçirdi.
Synag birnäçe näsazlyklary ýüze çykardy. Eýýäm 6000-10 000 gezek açylyp-ýapylandan soň gurluş garaşylmadyk ýagdaýda bökdäp başlady. 46 000 gezek açylyp-ýapylanda şarnir jygyldap başlady. 75 000 gezekden soň tomaşaçylar şarniriň ýanynda näbelli bir suwuklygy gördi. 100 müňe ýetilende displeýdäki epin has gowy görnüp başlady, şarnir bolsa ýeňil şatyrdy berdi. Ýöne ekran we mehanizm işlemegini dowam etdirdi.
175 000 gezek açylyp-ýapylandan soň smartfonda düýpli näsazlyk bolup geçdi – dinamikleriň biri işlemegini bes etdi. Ýöne bu, görnüşi ýaly, gönüden-göni açyp-ýapmak prosesi bilen baglanyşykly däl bolsa gerek.
Bu zatlaryň ählisine garamazdan, smartfon 200 000 gezek açylyp-ýapylandan soň hem “diri galdy”. Bu görkeziji, eger günde smartfony 100 gezek açyp-ýapsaň, onda bäş ýyl ulanylyşa barabardyr.
