Nissan Motor kompaniýasy Montini-Le-Bretonnýodaky (Fransiýa) sebit ofisiniň kärdeşler arkalaşygy bilen ştaty azaltmak barada gepleşiklere başlady. 560 töweregi adam zähmet çekýän bu ofisde kompaniýanyň Afrikadaky, Ýakyn Gündogardaky, Hindistandaky we Okeaniýadaky işleri hem dolandyrylýar.
Üýtgedip gurmak çäreleri täze baş direktor Iwan Espinosa tarapyndan 2025-nji ýylyň aprelinde yglan edildi. Nissan dünýädäki işgärleriniň 15%-ini azaltmagy meýilleşdirýär – bu, takmynan, 20 müň iş ornuna deňdir. Mundan başga-da, kompaniýa önümçilik kuwwatyny 30%, ýylda 2,5 mln awtomobile çenli azaldar. Zawodlaryň sany 17-den 10-a çenli azalar.
Bu ädimler 3,4 mlrd dollary tygşytlamaga gönükdirilendir. Şeýle çäreleriň sebäbi Hytaý we ABŞ ýaly esasy bazarlarda islegiň gowşaklygy bilen baglanyşykly boldy.
Nissan eýýäm Meksikadaky Civac zawodynda önümçiligiň bes ediljekdigi barada habar berdi, ol 2026-njy ýylyň martyna çenli ýapylar. Şeýle-de, Ýaponiýanyň Oppama (2028-nji ýylyň martyna çenli) we Sýonan (Nissan-Shatai, 2027-nji ýylyň martyna çenli) şäherlerindäki zawodlar işini bes eder.
Ýewropa, Afrika, Ýakyn Gündogar, Hindistan we Okeaniýa sebitlerinde Nissan-yň 19 müň töweregi işgäri zähmet çekýär, olardan 60%-i Ýewropada ýerleşýär.
