Google kompaniýasy Pixel 10 smartfonlarynyň görkezilmegine iki hepde galanda mahabat wideosyny hödürledi. Kompaniýa Siri ses kömekçisiniň EA wersiýasynyň uzaga çeken relizi sebäpli Apple-i ýaňsylamak mümkinçiligini hem elden gidirmedi.
Google Pixel 10 | Soon atly wideo 30 sekunt dowam edýär we onda repçi Dr. Dre-niň The Next Episode aýdymynyň sözsüz sazy ýaňlanýar – bu Beats by Dr. Dre brendiniň Google-a degişlidigine yşaratdyr.
Wideoda Moonstone reňkinde Pixel 10 Pro smartfony görkezilýär, kadr aňyrsyndaky ses bolsa şeýle diýýär:
“Eger siz tiz wagtdan çykmaly, ýöne bir ýyl bäri çykmaýan funksiýa sebäpli täze smartfon satyn alýan bolsaňyz… belki, “tiz wagtdan” sözüniň manysyna gaýtadan göz aýlamak ýa-da diňe smartfony çalyşmak gerekdir”.
Bu sözler Apple-iň WWDC 2024 tanyşdyrylyşyna yşarat edýär. Çünki, kompaniýa onda emeli aňyň esasynda Siri-ni anons edipdi. Ýöne täzelenen Siri-ni iPhone 16-a goşmak wadasyna garamazdan, funksiýa häzire çenli çykmady. 2025-nji ýylyň başynda kompaniýa relizi resmi taýdan geljek ýyla süýşürdi.
Wideo “Smartfonyňyzdan köp zat talap ediň” şygary bilen tamamlanýar. Ähtimal, bu Pixel 10-yň mahabat kampaniýasynyň esasy şygaryna öwrülse gerek. Ahyrynda kadrda täze smartfony tutýan el, soňra tanyşdyrylyşyň senesi – 20-nji awgust we Google-yň logotipi peýda bolýar.
