Demirgazyk Karolina döwlet uniwersitetiniň alymlary smartfonlara oturdylyp we ylmy derejeli analizator bolup biljek kiçijik spektral datçigi döretdiler diýip, SciTechDaily ýazýar.
Taslamanyň awtorlaryndan biri, maşyngurluşyk we aerokosmos inženerçiliginiň professory Brendan O'Konnor şeýle enjam bilen ulanyjylaryň, laboratoriýa anyklaýyş merkezlerine ýüz tutmazdan, önümleriň, daşky gurşawyň molekulýar düzümini we biologiki derňewleriň netijelerini alyp biljekdigini aýtdy. Bu adamlaryň gündelik durmuşyny ep-esli üýtgedip biler.
Işläp taýýarlama "ýeke pikselli" diýilýän kämilleşdirilen mini-spektrometrdir. Öňki işläp düzülenlerden tapawutlylykda, ol çylşyrymly optikany ýa-da ýokary woltly togy talap etmeýär we az energiýa sarp edýär. Enjam ultramelewşeden infragyzyla çenli aralykdaky ýagtylyk tolkunlaryna duýgur we spektri bir millisekuntda aýryp bilýär. Duýgurlygy sazlamak naprýaženiýäni üýtgetmek arkaly amala aşyrylýar.
"Biziň görkezme prototipimiz bary-ýogy birnäçe inedördül millimetr ýeri eýeleýär – ol islendik telefona ýerleşip biler. Isleseňiz, ony piksel ýaly kiçijik edip bilersiňiz" - diýip, O'Konnor düşündirýär.
Barlagçylar tehnologiýanyň has uly enjamlaryň ornuny tutjakdygyny we ulanyjylary materiallary we biolukmançylyk görkezijileri seljerjek takyk gurallar bilen gönüden-göni smartfonyň ýüzünde üpjün etjekdigini bellediler.
