Microsoft korporasiýasy ýakyn 3-8 ýylda neýroulgam tehnologiýalarynyň täsiri astynda ýitip gitjek ýa-da üýtgäp biljek 40 hünäriň sanawyny düzdi.
Barlag dokuz aýyň dowamynda geçirildi. Kompaniýanyň hünärmenleri emeli aňyň haýsy ugurlarda işjeň ulanylýandygyny kesgitlemek üçin amerikan ulanyjylary bilen Copilot çat-botunyň arasynda 200 000 sany näbelli gepleşikleri seljerdi.
Barlagçylaryň kesgitlemegine görä, AI köplenç dil bilen baglanyşykly meselelerde ulanylýar. Şol sebäpli terjimeçiler iň ejizleriň hataryndadyr. Microsoft algoritmleriň eýýäm sinhron terjimäniň hötdesinden üstünlikli gelýändigini belleýär.
Ikinji ýerde – taryhçynyň hünäri. Kompaniýanyň berýän maglumatlaryna görä, maglumat gözlemek, faktlary barlamak we çeşmeleri seljermek haýyşlary Copilot bilen ýerine ýetirilýän, iň giň ýaýran amallar boldy.
Sanawda ýazyjylar, satyjylar, redaktorlar, žurnalistler, web-işläp düzüjiler, hostlar, konsýeržler, jaň merkeziniň operatorlary, dellalçylyk işgärleri, radionyň alyp baryjylary we hatda CNC-li stanok operatorlary hem bar. Bu hünärleriň umumylygy tekstler, maglumatlary işlemek we gaýtalanýan wezipeler bilen işlemekden ybaratdyr.
Microsoft neýroulgamyň bu hünärleri düýbünden çalşyp bilmejekdigini, ýöne olaryň işe bolan çemeleşmesini düýpgöter üýtgetjekdigini belleýär. Şol bir wagtyň özünde, kompaniýanyň pikirine görä, massažçylar, enekeler, sürüjiler we üçek ussalary ýaly fiziki barlygy talap edýän hünärler üçin awtomatlaşmak töwekgelçiligi pes bolup galýar.
