Universal Pictures we Amblin Entertainment “Kasper” filmini 30 ýyllygy mynasybetli gaýtadan prokata çykarar. Görkeziliş 3-nji oktýabrdan 31-nji oktýabr aralygynda bolar diýip, Bleeding Cool habar berýär.
“Kasperiň” premýerasy 1995-nji ýylyň 28-nji maýynda boldy. Film 1945-nji ýylda Seýmur Reýt we Jo Oriolo tarapyndan döredilen Harvey Comics komiksleriniň gahrymanyna esaslanýar.
Film köne jaýda ýaşaýan we adamlar bilen dostlaşmagy arzuw edýän ruh Kasper barada gürrüň berýär. Bu öýe göçüp gelen doktor Harwi we onuň gyzy Ket ruh bilen tanyşýar.
Režissýor Bred Silberling filmi baş keşplerde Bill Pullman we Kristina Riççi bilen düşürdi. Kaspere Malaçi Pirson ses berdi. Filmiň býujeti 55 mln dollar (häzir bu mukdar inflýasiýany göz öňünde tutanyňda 116 mln dollar), kassa ýygymy bolsa 288 mln dollar (häzirki hümmet boýunça, takmynan, 480 mln dollar) boldy.
Filme wizual effektleri, Kasperiň animasiýasy we dostluk barada täsirli wakasy üçin oňyn baha berildi. Onuň esasynda animasion seriallar: “Kasperiň gorkunç täze başdangeçirmeleri” (1996, 52 bölüm) we “Kasperiň gorky mekdebi” (2006-2012, 52 bölüm), şeýle-de iki prikwel – “Kasper: Joşgunly başlangyç” (1997) we “Kasper bilen Wendiniň duşuşygy” (1998) düşürildi.
