“Ümsüm ýer” (Тихое место) filminiň üçünji bölümi 2027-nji ýylyň 9-njy iýulynda prokata çykar. Filmiň režissýory we ssenariniň awtory Jon Krasinski bolar diýip, The Hollywood Reporter habar berýär.
Filmiň önümçiligi bilen Paramount studiýasy meşgullanar. Aktýorlar düzümi barada maglumat entek ýok.
Franşiza 2018-nji ýylda çykyp başlady. Ilkinji film we onuň 2020-nji ýylda çykan dowamy Krasinski tarapyndan düşürildi. Iki filmde-de baş keşbi Emili Blant ýerine ýetirdi.
Üçünji bölümi çykarmak meýilnamalary barada 2022-nji ýylda yglan edildi, şol wagt premýera 2025-nji ýyla meýilleşdirilipdi. Ýöne munuň deregine studiýa “Birinji gün” ady bilen prikwel düşürmek kararyna geldi. Ol 2024-nji ýylyň iň üstünlikli filmleriniň biri boldy.
Täze bölümde wakanyň üns merkezinde ýene-de Ebbott maşgalasynyň bolmagyna garaşylýar. Prodýuser Bred Fuller “Ümsüm ýer-3” filminiň üstünde Krasinski häzirki taslamasyny tamamlan badyna işlenip başlanjakdygyny aýtdy.
