“Barselonanyň” we Madridiň “Realynyň” weteranlary ýene-de meýdançada duşuşar – bu gezek 9-njy we 13-nji sentýabrda ABŞ-da iki oýun geçiriler. Bu barada katalon klubunyň metbugat gullugy habar berdi.
Weteran El-Klasikosy Harrisonda (Nýu-Jersi) we Fort-Loderdeýlde (Florida) geçiriler. Birinji oýun MLS-iň “Nýu-Ýork Red Bullz” klubunyň öý meýdançasy bolan Sports Illustrated stadionynda bolar. Bu stadion 25 000 tomaşaça niýetlenýär.
Ikinji duşuşyk 21 550 adamy sygdyrýan Chase Stadium-da bolar. Bu “Barselonanyň” öňki oýunçylary Lionel Messiniň, Serhio Busketsiň, Luis Suaresiň we Žordi Albanyň häzir çykyş edýän “Inter Maýami” klubunyň öý meýdançasydyr.
“Barselonanyň” legendalar toparynyň baş tälimçisi Albert Ferrer oýunlarda Riwaldo, Adriano, Klaudio Brawo we Paulinýo bil baglap biler – soňky ikisi üçin bu weteranlaryň düzüminde ilkinji çykyş bolar. Katalon toparynyň galan gatnaşyjylary soň yglan ediler.
Iki klubuň weteranlarynyň arasyndaky oýunlar halkara futbol arenasynda yzygiderli waka öwrüldi. Bu olaryň eýýäm sekizinji we dokuzynjy duşuşygy bolar, şolardan bäşisi geçen möwsüm geçirildi. Soňky oýun şu ýylyň aprel aýynda Meksikanyň Toluka şäherinde geçdi. Ondan öň toparlar Beýrutda, Tel-Awiwde, Dohada, Tokioda, Puerto-Rikoda we Mumbaýda duşuşdy.
Oýunlar 2016-njy ýylda döredilen we klubuň özi tarapyndan dolandyrylýan “Barsanyň legendalary” maksatnamasynyň çäklerinde geçiriler. Ol “Barselonanyň” brendini dünýä tanatmaga we onuň öňki ýyldyzlarynyň üsti bilen klubuň gymmatyny artdyrmaga gönükdirilýär. Maksatnama hereket edip başlany bäri 80-den gowrak oýunçy dünýäde katalon klubunyň legendalarynyň azyndan bir oýnuna gatnaşdy.
