Angliýanyň “Mançester Siti” futbol klubunyň we Norwegiýanyň milli ýygyndysynyň hüjümçisi Erling Holand “Time” žurnalynyň daşynda peýda boldy. Futbolçy neşiriň täze sanynyň daşyny X sosial ulgamynda paýlaşdy.
Suratda Holand ellerini kellesiniň yzynda goýan görnüşde dur we “GOLA GÖNÜKDIRILEN” (GOAL ORIENTED) ýazgysy bar.
Žurnalda neşir edilen interwýuda Holand Norwegiýanyň Brýune şäherçesinde geçen çagalygy, futboldaky ilkinji ädimleri we “Moldede” oýnamak üçin 16 ýaşynda öýden çykyp gaýdyşy barada gürrüň berdi. Söhbetdeşligiň üsti bilen Holandyň tebigy tagamlaryň tarapdarydygy we sygryň ýüregini iýmegi gowy görýändigi belli boldy. Şeýle-de, ol buzly wanna düşüp, ýatmazdan öň gök ýagtylygy petikleýän äýnegi geýýär.
Mundan başga-da, ol özüniň Messiniň we Ronaldunyň rekordyny täzeläp biljekdigi baradaky soraga jogap berdi. Holand ony hiç kimiň, hatda özüniň hem başarmajakdygyny aýtdy.
Holand “Mançester Sitiniň” “Time” žurnalynyň daşynda peýda bolan ikinji oýunçysy boldy. Ondan öň, 2012-nji ýylda neşiriň baş sahabynda klubda 2010-njy ýyldan 2013-nji ýyl aralygynda oýnan italiýaly hüjümçi Mario Balotelli şekillendirilipdi.
