Apple iPhone üçin iOS 18.6-ny hödürledi. Täzelenme möhüm düzedişleri we howpsuzlyk kämilleşdirmelerini öz içine alýar. Bu 2025-nji ýylyň sentýabrynda iOS 26 çykmazdan ozal, ulgamyň soňky uly täzelenmesi bolsa gerek diýip, 9to5mac ýazýar.
Esasy üýtgeşmeleriň arasynda “Photos” programmasynda “Ýatlamalar” bölüminde kontentiň görünmegine päsgel beren näsazlyklaryň düzedilmegi bar. Şeýle-de, Ýewropa Bileleşiginiň ýurtlaryndaky ulanyjylar üçin üçünji tarap programma dükanlaryny gurnamak prosesi ýönekeýleşdirildi.
Işläp düzüjiler howpsuzlyk bilen bagly 20-den gowrak gowşaklygy düzetdi. Olaryň arasynda Safari brauzerinde ulanylýan WebKit dwižogy, şeýle-de ekranda maglumatlary seslendirmek üçin niýetlenen VoiceOver programmasy bilen bagly näsazlyklar bar.
iOS 18.6-ny 2018-nji ýyldan bäri çykan smartfonlar göterýär. Täzelenmäni gurnamak üçin “Sazlamalara” (Настройки) girip, “Esasylar” (Основные) bölümini we “Programma üpjünçiliginiň täzelenmesi” (Обновление ПО) punktyny saýlamaly. Ýygnama belgisi – 22G86. iPhone 16 Pro Max-da faýlyň möçberi 1,07 Gb.
2025-nji ýylyň sentýabrynda iPhone 17-niň çykmagy bilen iOS 26 atly täze ulgamyň ulanylyp başlanmagyna garaşylýar. Apple operasion ulgamlaryň tertip belgisinden ýüz öwrüp, olary ýyla görä atlandyrmak kararyna geldi. Şonuň üçin beýleki operasion ulgamlar hem şeýle atlandyrylar: iPadOS 26, macOS 26, watchOS 26, tvOS 26 we visionOS 26.
