“Býornli” futbol kluby taryhda ilkinji gezek futbol oýnuny wirtual hakykat görnüşinde ýaýlyma berer. Synag görkezilişi 9-njy awgustda bolar, şol gün klub öýünde “Lasio” italýan toparyna garşy ýoldaşlyk duşuşygyny geçirer.
Taslama sport pudagynda VR tehnologiýalaryna ýöriteleşen Rezzil kompaniýasy bilen hyzmatdaşlykda durmuşa geçirilýär. Ýaýlymy görmek üçin tomaşaçylara diňe wirtual hakykat garniturasy gerek. Onuň üsti bilen özüňi “Terf Mur” stadionynda ýaly duýmak, meýdançany doly görmäge mümkinçilik berýän “aýratyn ýeri” eýelemek, beýleki janköýerleriň seslerini we teswirlerini eşitmek bolar, şeýle-de oýun üçin taýýarlanan goşmaça materiallara elýeterli bolmak mümkin.
Guramaçylaryň aýtmagyna görä, ýaýlym ünsli we üznüksiz tomaşa üçin aýratyn gurşawy döredip, janköýerlere dünýäniň islendik künjeginde stadionyň atmosferasyny duýmaga mümkinçilik berer. Klub bu başlangyjyň “Býornliniň” janköýerler bilen sanly aragatnaşyk boýunça öňdebaryjylaryň biri hökmünde ornuny berkitjekdigine ynanýar.
“Býornli” bilen “Lasionyň” arasyndaky oýun 9-njy awgustda Aşgabat wagty bilen 19:00-da başlar. Wirtual hakykat režiminde tomaşa etmek Meta Quest VR garniturasynyň kömegi bilen Premier League Player programmasy arkaly mugt elýeterli bolar.
