Tesla bilen ýarymgeçiriji komponentleri öndürmek üçin 16,5 milliard dollarlyk garaşylmadyk ýagdaýda şertnama baglaşandan soň, Samsung kompaniýasynyň paýnamalary 10% töweregi ýokarlandy. Iýul aýynyň başyndan bäri kompaniýanyň paýnamalary 20% gymmatlady. Munuň özi iýul aýyny kompaniýa üçin soňky 20 ýylda iň üstünlikli aýa öwürýär diýip, Bloomberg habar berýär.
Iýul aýynda Koreýanyň Kospi indeksindäki girdejiniň ýarysyndan gowragy Samsung-yň paýnamalarynyň hasabyna gazanyldy. Bu ýagdaý maýa goýujylaryň kompaniýa bolan uly gyzyklanmasyny görkezýär.
Analitikleriň pikiriçe, Tesla bilen hyzmatdaşlygyň üstünlikli amala aşyrylmagy Samsung-y iri tehnologiýa kompaniýalarynyň ygtybarly hyzmatdaşyna öwrüp biler. Şeýle-de, bu şertnama ABŞ-nyň Tehas ştatyndaky gurluşygy gijä galan zawodyň doly güýjünde işlemegini üpjün eder.
"Şu wagta çenli bazar Samsung-yň çip öndürýän biznesine, umuman, ähmiýet bermändi. Indi bolsa birden düşündi: 'Hawa, olar entek başarýarlar, ahbetin" diýip, Pictet Asset Management-yň baş maýa goýum dolandyryjysy Ýong Dže Li aýdýar.
Soňky ýyllarda Samsung dünýä çip bazarynda öz pozisiýasyny ýitirip, TSMC ýaly bäsdeşlerine we Apple ýaly iri müşderilere ýol berdi. Morgan Stanley-niň analitikleriniň hasaplamasyna görä, Tesla bilen gazanylan şertnama Samsung-yň bazar bahasyna 50 milliard dollardan gowrak goşant goşup biler.
"Tesla bilen hyzmatdaşlygyň yglan edilmegi Samsung-yň Amerikadaky önümçiliginiň ýokary tehnologiýaly derejesini tassyklaýar — bu bolsa Intel-iň ýerli önümçiligi ýola goýmakdaky kynçylyklarynyň çäginde has-da üns çekýär" - diýip, Allspring Global Investments-yň dolandyryjysy Geri Tan belleýär.
Şeýle-de bolsa, käbir analitikler Tesla bilen gazanylan üstünlikleriň Samsung-yň emeli aň ugruna doly geçişini kepillendirmeýändigini duýdurýarlar.
