Gilmour Space Technologies kompaniýasy Awstraliýanyň çäginden ýarym asyryň içinde ilkinji orbital uçuşy amala aşyrdy, ýöne missiýa şowsuz tamamlandy.
Eris raketasy 29-njy iýulda ýerli wagt bilen 8:35-de Kwinslenddäki Bouen kosmodromyndan uçdy. Uçuşdan 14 sekuntdan soň raketa ýolundan gyşaryp, aşak gaçdy. Enjamyň hereketlendirijisi 23 sekunt işledi we bu geljekki missiýalar üçin maglumatlary ýygnamaga mümkinçilik berdi.
Beýikligi 25 metr bolan Eris raketasy Gün-sinhron orbitasyna 215 kg çenli ýa-da 500 km beýiklikdäki ekwatorial orbita 305 kg çenli ýük çykarmaga niýetlenendir. Ol ilkinji iki basgançakda Sirius gibrid hereketlendirijileri we üçünjisinde Phoenix suwuklyk hereketlendirijisi bilen enjamlaşdyryldy.
Şowsuzlyga garamazdan, Gilmour Space ruhdan düşmeýär we indiki synanyşyk TestFlight 2-ä taýýarlanýar. Alnan maglumatlar taslamany kämilleşdirmäge mümkinçilik berer.
Uçuş ençeme gezek yza süýşürildi. Ilkibaşda ol 2025-nji ýylyň mart aýyna meýilleşdirildi, ýöne “Alfred” tropiki siklon sebäpli soňa goýuldy. Maý aýynda uçuş gorag ulgamyndaky bökdençlik sebäpli ýatyryldy. Howa şertleri, hususan-da, güýçli ýel uçuşy iýundan iýula geçirdi.
