Sosial ulgamlarda iPhone 17 Pro-nyň ilkinji hakyky suratlarynyň biri peýda boldy. Skyfops lakamly ulanyjy San-Fransiskonyň köçesinde täze smartfony synagdan geçirijini surata aldy. Suratyň hakykylygyny Bloomberg-iň žurnalisti Mark Gurman hem tassyklady.
Ozal ýaýran maglumatlara görä, iPhone 17 Pro aýratyn ýagtylandyryş datçigi bilen öňe çykyp duran kamera bloguna eýe bolar. Özünden öňküden tapawutlylykda, yzky panel titanyň deregine aýnadan we alýuminden ýasaldy. Bu smartfony has ýeňil etmeli.
MacRumors neşiriniň näbelli çeşmä salgylanyp habar bermegine görä, iPhone 17 Pro we 17 Pro Max modelleri 8 esse optiki zumly täze teleobýektiwe eýe bolar. Bu Apple smartfonlary üçin rekord görkezijidir – häzirki iPhone 16 Pro-da 5 esse ýakynlaşdyrma ulanylýar. Täze kameranyň dürli fokus aralygynda has gowy işlejekdigi bellenilýär.
Şeýle-de, gurluş kamerany dolandyrmak üçin goşmaça düwme bilen üpjün ediler. iPhone 16 hatarynda surata we wideo almaga, režimleri üýtgetmäge we masştaby dolandyrmaga mümkinçilik berýän Camera Control düwmesi peýda bolupdy. Täze modellerde şeýle düwmeden iki sanysy bolar.
Şeýle-de, iPhone 17 Pro üçin professional ulanyjylara gönükdirilen surata düşüriş üçin täze programma işlenip taýýarlanýar. Ol Halide, Kino we Filmic Pro ýaly hyzmatlar bilen bäsleşer.
iPhone 17, 17 Pro we has inçe iPhone 17 Air modelleriniň sentýabryň başynda görkezilmegine garaşylýar.
