Boeing korporasiýasy ikinji çärýek üçin maliýe netijelerini hödürledi. Ýitgi 176 mln dollar boldy we bu 2024-nji ýylyň degişli döwründäki görkezijiden ep-esli azdyr. Şol wagt ýitgi 1,09 mlrd dollar bolupdy. Hasabat döwründe girdeji analitikleriň çaklamalaryndan ýokary bolup, 22,75 mlrd dollara ýetdi. Bu bir ýyl ozalkydan 35% köpdür.
Kompaniýa hasabatynda önümçiligiň durnuklaşandygyny we önümleriň hem hyzmatlaryň hiliniň ýokarlanandygyny belledi.
Ikinji çärýekde Boeing aýda 38 sany Boeing 737 uçaryny çykardy. Bu çäk 2024-nji ýylyň ýanwaryndaky hadysadan soň ABŞ-nyň Federal raýat awiasiýa edarasy (FAA) tarapyndan kesgitlendi. Şonda Alaska Airlines awiakompaniýasynyň Boeing 737 Max 9 uçarynyň uçuş wagtynda ätiýaçlyk çykalgasynyň gapagy aýryldy, bu hem salonyň germetikliginiň bozulmagyna getirdi. Derňew tamamlandy we indi kompaniýa önümçiligi artdyrmak üçin FAA-dan rugsat almak isleýär.
Geçen çärýekde Boeing sargyt edijilere 150 uçar iberdi. Bu 2018-nji ýyldan bäri ikinji çärýek üçin iň ýokary üpjünçilik görkezijisidir. Şol ýyl kompaniýanyň ýyllyk girdejini alan soňky ýyly bolupdy.
