Günüň üstünde 2022-nji ýyldan bäri ilkinji gezek polýar koronal deşikler peýda bolup başlady. Bu barada Russiýanyň Ylymlar akademiýasynyň Kosmos barlaglary institutynyň we Sibir bölüminiň Gün-Ýerüsti fizika institutynyň web sahypasyna salgylanýan TASS habar berdi.
Çap edilen maglumatlara görä, bu gurluşlar 2021-2022-nji ýyllarda ýitirim boldy diýen ýaly we soňky bir hepdäniň dowamynda gaýdyp gelmäge başlapdyr. Kosmosdan alnan suratlara görä, indi demirgazyk koronal deşik emele gelipdir. Şuňa meňzeş gurluşyň bir aýyň içinde günorta polýus sebitinde hem peýda bolmagyna garaşylýar.
Alymlaryň bellemegine görä, täze dörän deşikler Günüň işjeňliginiň serpilmegi netijesinde ýok edilmese, olar ýakyn 6-8 ýylda Gün diskiniň görünýän bölegi bolup galar.
Laboratoriýanyň berýän maglumatlaryna görä, polýar koronal deşikleriň emele gelmegi Günüň işjeňliginiň gowşamagy bilen baglanyşyklydyr. Soňky ýyllarda olaryň ýoklugy 2023-2024-nji ýyllarda Gün sikliniň iň ýokary derejesiniň geçendigi bilen düşündirilýär.
Şeýle hem hasabatda polýar koronal deşikleriň adaty görnüşlere meňzeşdigi, ýöne diňe Günüň demirgazyk we günorta polýuslarynyň golaýynda emele gelýändigi aýdylýar. Mundan başga-da, olaryň ömri adaty gurluşlaryň ömründen ep-esli uzakdyr: eger adaty deşikler 2-3 aý durýan bolsa, polýar deşiklerini bir duran ýerinde birnäçe ýyl synlap bolýar.
