Toyota kompaniýasy Supra modeliniň indiki neslini işläp taýýarlamakda BMW bilen hyzmatdaşlygyny bes eder. Bu barada Best Car ýapon neşiri habar berdi.
2027-nji ýylyň täze GR Supra modeli doly derejede ýapon üpjünçiligine eýe bolar: awtomobil Toyota-nyň kuwwaty, takmynan, 400 at güýji bolan 2,0 litrlik gibrid hereketlendirijisi bilen enjamlaşdyrylar, şol bir wagtyň özünde model yzky herekete getirijini saklap galar.
Häzirki nesil A90 Supra BMW bilen bilelikde taýýarlanan bolup, ol nemes platformasyny, şol sanda 3,0 litrlik turbo hereketlendirijisini ulanýar. Bäş ýylyň içinde ABŞ-da 24 000 töweregi, ýagny meňzeş BMW Z4 bilen deňeşdirilende tas iki esse köp Supra-nyň satylandygyna garamazdan, Gazoo Racing bölümçesi bilelikdäki platformadan ýüz öwürmek kararyna geldi.
2025-nji ýylyň mart aýynda Ýaponiýada 434 a.g. kuwwatly Final Edition Supra hödürlendi, onuň bahasy 15 mln ýena (takmynan, 101 000 dollar) boldy. ABŞ-da 382 a.g. hereketlendirijili we alty basgançakly mehaniki hereket gutusy bilen 100 ulagdan ybarat çäkli tapgyr çykaryldy. Ol 69 085 dollardan hödürlendi.
Häzirki Supra-nyň önümçiliginiň 2025-nji ýylyň ahyryna çenli tamamlanmagyna garaşylýar, täze wersiýa bolsa 2027-nji ýylda hödürlener. Resmi däl maglumatlara görä, Toyota CX-70 modelinden 6 silindrli Mazda hereketlendirijisini hem synagdan geçirýär, ýöne esasy üns ýeňil we netijeli gibrid hereketlendirijisine gönükdiriler.
