Hytaýyň BYD awtoulag öndürijisi hytaý brendleriniň içinde ilkinji bolup Samsung Galaxy Watch akylly sagatlarynda sanly düwmelere goldawy ornaşdyrdy. NFC tehnologiýasyny ulanýan bu funksiýa häzirlikçe diňe Hytaýda bar, ýöne geljekde beýleki bazarlarda hem peýda bolup biler diýip Sammobile ýazýar.
Sanly açar Galaxy Watch 7-de, Watch 8-de, Watch 8 Classic-de we Galaxy Watch Ultra-da goldanýar. Onuň işlemegi üçin Samsung Smart Card programmasynyň 5.1.38 wersiýasy ýa-da has täze wersiýalary we BYD Auto programmasynyň 9.3.0 wersiýasy ýa-da ondan soňraky wersiýalary gerek bolýar.
BYD Bluetooth, bulut hyzmatlary, NFC we UWB protokoly arkaly işleýän Android, HarmonyOS we iOS platformalarynda smartfonlar üçin sanly açarlary eýýäm durmuşa ornaşdyrdy. Galaxy Watch-da diňe NFC goldanylýar. Işledilenden soň sanly açary maşgala agzalaryň ýa-da dostlaryň bilen paýlaşyp bolýar we ol sagatda-da, smartfonda-da işlär.
Bu integrasiýa Samsung-yň baş direktory Li Çže Ýonuň Hytaýa eden saparynyň netijesi bolsa gerek. Ol Hytaýyň prezidenti Si Szinpin bilen duşuşdy we awtoulag pudagynda hyzmatdaşlygy berkitmek üçin BYD-nyň Şençženen merkezine baryp gördi.
