Apple iOS 26-da “Habarlar” (Messages) programmasyna spamy we fişingi filtrden geçirmek ulgamyny goşdy. Bu barada 9to5Mac portaly ýazýar.
Programmada habarlaryň täze kategoriýalary peýda boldy: “Habarlar”, “Näbelli iberijiler”, “Spam” we “Ýakynda pozulanlar”. Ulanyjylar bu aýratyn bukjalary işjeňleşdirip ýa-da öçürip, filtrden geçirmegi elde sazlap biler.
Esasy bölümde belli kontaktlar bilen ýazyşylan habarlar, tassyklama kodlary we bron maglumatlary görkezilýär. Nätanyş belgilerden gelen habarlar we spam ondan aýrylýar.
“Filtri dolandyrmak” funksiýasy belgileri ygtybarly diýip bellemäge we ýalňyşlyk bilen spam hökmünde kesgitlenen habarlary dikeltmäge mümkinçilik berýär. Şeýle-de, “Näbelliler” bukjasynda iberijileri tanyş hökmünde bellemek mümkinçiligi bar.
“Spam” papkasynda salgylanmalar işjeňsizlendirilýär we ulanyjylar habarlara jogap berip bilmeýär. Bu hem tötänleýin zyýanly salgylanma geçmek ýa-da kezzaplar bilen aragatnaşyk etmek ähtimallygyny peseldýär. Zerur bolan ýagdaýynda habarlary elde esasy bölüme geçirip, Apple-e ulgamyň ýalňyşlygy barada habar berip bolýar.
Filtr ulgamy awtomatik usulda we ulanyjy sazlamalaryny göz öňünde tutup işleýär. Täzelenmede esasy üns fişingden goramaga gönükdirildi.
iOS 26 häzir beta-wersiýa görnüşinde elýeterli. Ahyrky reliziň sentýabryň ortasynda, iPhone 17-niň tanyşdyrylyşyndan soň bolmagyna garaşylýar.
