Hytaýyň Sinhuandao şäherindäki adaty hytaý we günbatar lukmançylyk hassahanasynda argynlykdan ejir çekýän adamlar üçin "Dislike Going to Work Clinic" ady bilen klinika açyldy. Bu barada South China Morning Post neşiri habar berýär.
Şeýle başlangyç öz çagalaryny Dislike Going to School Clinic klinikasyna äkiden ene-atalar ulular üçin hem şeýle edaranyň bardygy ýa-da ýokdugy bilen gyzyklanandan soň peýda boldy. Çagalar klinikasy okuw, mekdep atmosferasy we emosial kynçylyklar bilen bagly dartgynlylyga garşy göreşmek üçin döredildi.
Täze klinika öz işini manysyz duýýan, ýadawlykdan, gowşamadan ýa-da şähdiň üýtgäp durmagyndan ejir çekýän hassalar üçin niýetlenýär. Edaranyň ýolbaşçysy Ýue Liminiň aýtmagyna görä, “howsalalyk” ýa-da “depressiýa” ýaly adalgalaryň ulanylmagy hassalarda utanç we ýazgarylma duýgusyny döredip biler. Täze format bolsa, onuň pikiriçe, has rahat şertleri döretmäge kömek edýär.
“Daşky alamatlaryň, köplenç, çylşyrymly psihologik we sosial sebäpleri bolýar. Biz olary anyklamaly, takyk diagnoz goýmaly we laýyk gelýän bejergini teklip etmeli” – diýip, hünärmen belledi.
Anyklaýyş lukman bilen maslahatlaşmagy we gipertireoz ýaly fiziologik sebäpleri aradan aýyrmak üçin lukmançylyk barlagyndan geçmegi öz içine alýar.
Klinikanyň açylmagy hytaý sosial ulgamlarynda işjeň pikir alyşmalara getirdi. Ulanyjynyň biri döredijini “zehin” diýip atlandyrdy, beýlekisi bolsa “Ol ýerde lukmanlary tapyp bolmaz – olar hem işlemek islemeýär” diýmek bilen degişdi.
Lukmanlaryň belleýşi ýaly, häzirlikçe hassalaryň sany az bolmagynda galýar.
