Hakerler topary bir ygtybarsyz parolyň netijesinde 158 ýyllyk kompaniýany ýok edip, 700 adamy işsiz goýup bildi diýip, BBC habar berýär.
Nortgemptonşirde (Beýik Britaniýa) ýerleşýän KNP ulag kompaniýasy Akira hakerler toparynyň kiberhüjümi netijesinde öz işini bes etdi. Bellenilişi ýaly, olar işgärleriň biriniň parolyny alyp, kompaniýanyň ulgamyny döwüp bildi. Şondan soň olar maglumatlary şifrläp, kompaniýadaky kompýuterleriň işini bloklady.
Şol bir wagtyň özünde, hakerler şeýle habar galdyrdy: “Eger siz muny okaýan bolsaňyz, diýmek, siziň kompaniýaňyzyň içki infrastrukturasy doly ýa-da bölekleýin ölendir... Geliň, ähli gözýaşlary we öýke-kineleri goýup, ylalaşyk gazanmaga synanyşalyň”.
Hakerler bahany aýtmady, ýöne töleg barada gepleşikleri alyp barmaga ýöriteleşen firma bu ýagdaýda bahany 5 mln funt sterling diýip hasaplady. KNP-niň şonça mukdarda puly ýokdy, şol sebäpli kompaniýa ähli maglumatlara elýeterliligini ýitirip, ahyrynda batdy.
BBC neşiri KNP-niň Akira toparynyň hereketlerinden zyýan çeken “onlarça müň” guramanyň biri bolandygyny belledi. Umuman, neşiriň maglumatlaryna görä, geçen ýyl Beýik Britaniýada dürli kompaniýalara 19 müň töweregi kiberhüjüm hasaba alyndy. Ýurtda şeýle hüjümlerde ortaça 4 mln funt sterling talap edilýär we zyýan çeken guramalaryň, takmynan, üçden bir bölegi mejbury tölemeli bolýar.
